Ministrja e Kulturës Bisera Kostadinovska-Stojçevska, sot gjatë inspektimit të punimeve të ndërtimit të Teatrit turk, theksoi se me vendimin e Qeverisë për tre vjet financim të vazhdueshëm të projektit për Teatrin turk, ka garanci se së shpejti ekipi teatror i këtij institucioni do të ketë shtëpinë e tij.
“Ministria e Kulturës vazhdon ta financojë projektin pa ndërprerje, për të cilin në tri vitet buxhetore (2024, 2025 dhe 2026) janë parashikuar mjete në vlerë prej 6,1 milionë euro, gjegjësisht 380 milionë denarë”, tha Kostadinovska-Stojçevska duke theksuar se me këto fonde do të përfundojnë punimet ndërtimore, vendosja e instalimeve, rregullimi i ambienteve të brendshme dhe do të sigurohet mbikëqyrje eksperte që teatri të marrë formën e tij.
Kostadinovska-Stojçevska shtoi se po ashtu, me rritjen e vazhdueshme të pagave të punëtorëve të kulturës, të cilat në vitet e kaluara kanë arritur në 52 për qind, siç tha ajo, ne tregojmë respekt për dinjitetin dhe punën tuaj dhe ju motivojmë që të vazhdoni me projekte të suksesshme”.
Ministrja e Kulturës informoi se nga buxheti i Ministrisë së Kulturës për këtë vit janë siguruar një milion e shtatëqind mijë euro ose 104 milionë denarë, ndërsa progresi në ndërtimin e objektit është i dukshëm, sidomos në pjesën e fasadës dhe kulmit, duke shtuar se për gjithë atë që është realizuar tani janë ndarë 4,4 milionë euro ose 274 milionë denarë.
Kostadinovska-Stojçevska, duke theksuar rëndësinë e Teatrit turk tha: “Diversiteti kulturor dhe gjuhësor, që e bëjnë vendin tonë një mozaik unik, ka qenë gjithmonë i rëndësishëm për ne. Teatri turk u përpoq të promovonte vlera të tilla dhe të kontribuonte në ndryshime pozitive në shoqëri”.
Ministrja e Kulturës shtoi se është nder, por edhe përgjegjësi e madhe që procesi i aktiviteteve ndërtimore të zhvillohet profesionalisht dhe me cilësi, duke theksuar se Qeveria është e vendosur që të gjitha objektet e filluara kulturore t’i përfundojë me cilësi maksimale dhe në një procedurë transparente.
“Ne jemi duke punuar në mënyrë aktive në rindërtimin e një numri të madh të qendrave kulturore që janë lënë pas dore prej vitesh, të gjitha me qëllimin përfundimtar – të vazhdojmë të përmirësojmë kushtet e punës së punonjësve të kulturës, dhe më tej të ofrojmë përmbajtje më të madhe dhe më cilësore për publikun dhe së bashku promovojmë teatrin”, tha Kostadinovska-Stojçevska, duke shtuar se investimi në kulturë është interesi ynë në të ardhmen dhe në zhvillimin e kulturës dhe identitetit maqedonas.
Drejtoresha e I.N Teatrit turk Ajlin Emin Skoro, tha në deklaratën për mediat se I.N Teatri turk ka 74 vjet që funksionon, krijon në vendin tonë dhe prej 10 vitesh punon dhe krijon nën të njëjtën çati dhe në të njëjtën skenë me Teatrin “Komedia”.
“Objekti që po ndërtohet është konceptuar si qendër kulturore që do të promovojë dhe afirmojë gjuhën dhe kulturën e popullit turk këtu”, tha Emin Skoro, duke shtuar se po fillon faza e tretë gjegjësisht prokurimi publik për instalimet e brendshme: mekanika, elektrika, uji dhe kanalizimi.
Video link nga konferenca për shtyp e Ministres së Kulturës Bisera Kostadinovska-Stojçevska: Deklaratë Bisera Kostadinovska Stojçevska .
Pasqyrë e punimeve të ndërtimit të objektit të Teatrit turk