Во хотелот „Лимак“ во Скопје почна да се снима „Кајмак“, седмиот филм на режисерот Милчо Манчевски. Филмот ќе се снима пет недели на локации низ Скопје, во населбите Козле, Автокоманда, Центар и Лисиче.
„Кајмак“ е европска копродукција во која поголем дел од финансиите се од странство – 52 процента од средствата се од филмските фондови на: Данска, Холандија, Хрватска и Бугарија, а 48 проценти од нашата Агенција за филм. „Кајмак“ доби поддршка и од европскиот фонд „Еуримаж“. Помогнат е од голем број домашни и странски поединци и компании. Копродуцент е Македонската радио-телевизија, а во екипата се вклучени филмски работници од Англија, Италија и од Србија.
Во актерската екипа се: Камка Тоциновски, Сара Климоска, Александар Микиќ, Ана Стојановска, Симона Спировска, Петар Мирчевски, Филип Трајковиќ, Сашка Димитровска, Лазе Манасковски и други.
Продукциски дизајнер е Дејвид Манс од Англија, директор на фотографија е Данецот Улрик Боел Бенцен, кастинг-директор е Милка Анчевска, костимограф е Жаклина Крстевска, а дизајнер на шминка е Марио Микисанти. Македонски продуцент на филмот е „Банана филм“ со продуцентот Јане Ќортошев.