На сцената на Театарот за деца и младинци во Скопје вечер од 19 часот ќе се одржи праизведбата на претставата „Роња, ќерката на ограбувачот“ на светски познатата авторка Астрид Линдгрен, а во режија на Јакуб Максимов од Чешка.
Како што информираат од Театарот за деца и младинци, станува збор за текст што досега не е поставуван во форма на театарска претстава за деца во нашата земја.
Според директорката на Театарот, Катарина Илиевска-Силјановска, претставата ќе донесе оригинална свежина во репертоарот. Во самата претстава актерите играат, водат кукли, пеат, свират и колективно создаваат оригинално сценско дело.
Драматизацијата за претставата е на Горјан Милошевски. Во претставата играат: Матеа Јанковска, Ангела Димитрова, Никола Наковски, Катарина Илиевска-Силјановска, Петар Стојанов и Мики Анчевски.
Сценографијата за претставата, дизајнот на куклите, маските, костимите и дизајнот на плакатот и на брошурата се авторско дело на Олга Зјебинска од Полска. Композитор и корепетитор е гостинот од Србија, Лазар Новков.
Првата реприза на претставата наменета за деца над шест години е закажана за 27 декември од 19 часот.