Во рамките на традиционалната манифестација „Прличеви беседи“, во НУ Библиотека „Григор Прличев“ во Охрид утре (6 февруари) во 13 часот ќе биде одбележана 130-годишнината од објавувањето на неговата книга „Автобиографија“.
Охридската визита ќе започне со изведбата на „1762 лето“ во инструментална изведба на КУД „Ѓердан од бисери“, а извадоци од Прличевата „Автобиографија“ ќе чита Даријан Ангелоски.
Беседа за Прличев, под наслов: „Григор Прличев – метонимија на македонската гордост и страдање“, ќе одржи професор д-р Елизабета Шелева, по што ќе следува прогласување на добитникот на наградата за најдобра беседа во чест на Прличев за 2024 година, која годинава ѝ припадна на Алма Шемо од Филолошкиот факултет „Блаже Конески“ во Скопје, по потекло од Охрид.
Свое обраќање на Визитата ќе има и директорот на Библиотеката, м-р Милчо Јованоски, кој пред присутните ќе направи кус пресек на достигнувањата на установата меѓу двете одбележувања на патронатот.
Охридската визита, во рамките на манифестацијата „Прличеви беседи“, финансиски е поддржана од Министерството за култура и од Општина Охрид.