Në Kinotekën e Maqedonisë sonte do të hapet ekspozita e astrofotografive të Shoqatës Astronomike të Shkupit. Ekspozita organizohet me rastin e 25 vjetorit të krijimit të Shoqatës Astronomike të Shkupit.
Ekspozita do të prezantojë fotografi të anëtarëve të Shoqatës Astronomike të Shkupit të realizuara në vende të ndryshme në Maqedoni. Qëllimi është të përcjellë bukurinë dhe pamjet frymëzuese që mund të shihen në qiellin e natës me sy të lirë, fotoaparat ose teleskop.
Përmes astrofotografive do të prezantohen shumë lloj objekte qiellore, si galaktikat, mjegullnajat, grupimet e yjeve, objektet nga sistemi diellor, satelitët artificialë, si dhe fotografi peizazhi me motive astronomike.