Северна Македонија го честита 75-годишниот јубилеј на УНЕСКО

од admin_kult

Република Северна Македонија со честитка се вклучи во одбележувањето на 75-годишнината од основањето на УНЕСКО. Пораките што секоја земја ги испраќа во светот, а кои од денеска се шират преку мрежата на светската организација, Северна Македонија ги прати во видеозапис со културните и природните богатства и со учество на „Чалгија саунд  систем“.

Со оваа порака, Северна Македонија се вклучува во виртуелната прослава на јубилејот на УНЕСКО:

„Република Северна Македонија е членка на УНЕСКО од 1993 г., но како дел од поранешна Југославија, ние сме членка на ова светско семејство речиси колку нејзиниот јубилеј.

УНЕСКО за нас значи признавање на културните и природните добра што ги имаме во изобилство, како и промоција во светот. УНЕСКО пред 42 години на својата престижна листа го впиша Охридскиот Регион како светско природно и културно наследство со универзална вредност. Ние сме горди на тој чин и на сето внимание што со децении го добиваме од УНЕСКО, не само за овој бисер на Балканот.

Во светот, УНЕСКО има поголема и суштинска улога, а тоа е хуманоста и солидарноста на целата планета.

УНЕСКО се грижи за културните и за природните добра, за образованието,  за основните човекови права во земји каде што од политички или економски причини, тие права се на последното место.

Едноставно, УНЕСКО е засолниште на сė што е вредно, а може да биде уништено.

Со фрагменти од најубавите слики и звуци кои се наше, но и светско богатство, му го честитаме 75-тиот  роденден на УНЕСКО. Среќа што постои, особено во времето што претстои“.

Уставот на УНЕСКО беше усвоен и потпишан на 16 ноември 1945 година во Лондон и стапи на сила на 4 ноември 1946 година во Париз.

УНЕСКО од организација на Обединетите нации со 41 држава членка во 1945 год., прерасна во организација со 193 држави членки и 11 придружни членки во 2021 година.

Денес таа е одговорна за донесувањето на најважните светски инструменти за воспоставување   стандарди, вклучувајќи ја и Конвенцијата за светско наследство од 1972 год., предводник на многу иницијативи и водечки реализатор на главните програми на ОН во културата, образованието, науката и информациите.

Секоја држава членка својот документ на ратификација може да го добие на следниов линк: https://atom.archives.unesco.org/member-state-ratifications.

Дигиталната копија на оригиналот на Уставот на УНЕСКО од 1945 година е достапна на следниов линк: https://atom.archives.unesco.org/constitution.

Линкот од веб-страницата на УНЕСКО по повод 75-годишниот јубилеј е: https://www.unesco.org/en/75th-anniversary.

 

Можеби ве интересира:

Leave a Comment

Страницата на Министерството за култура на РС Македонија користи т.н. „колачиња“ со цел да обезбеди подобро корисничко искуство. Прифати Повеќе