Отворен е првиот повик „Културата ја движи Европа“ (Culture Moves Europe) наменет за индивидуална мобилност на уметниците и на професионалците од културниот сектор, со краен рок за поднесување на апликациите – 31 мај 2023 година во 23:59 часот по средноевропско време.
„Културата ја движи Европа“ (Culture Moves Europe), како нова грантова шема на програмата „Креативна Европа“ на Европската Унија, ја спроведува Гете-институтот.
Повикот е наменет за уметниците и за професионалците од културниот сектор во земјите кои учествуваат во програмата „Креативна Европа“ и ги опфаќа следниве области: музика, книжевни преводи, архитектура, културно наследство, дизајн и моден дизајн, визуелни уметности и изведувачки уметности.
Поддршката опфаќа:
- Индивидуална мобилност на уметници и на професионалци од областа на културата
- Резиденцијални програми
Финансиската поддршка што се обезбедува преку повикот се однесува на патните трошоци (превоз, сместување итн.) за уметниците и за професионалците од областите во културата кои сакаат да спроведат проект со меѓународен партнер (организација или поединци).
Грантовата шема за мобилност им овозможува на апликантите да ги интернационализираат своите активности и хоризонти преку една од следниве цели: истражување на богатото културно наследство на Европа; создавање, односно кокреација и/или развој на уметнички содржини со уметници и културни професионалци од други земји; учење, односно учество во неформално образование; поврзување, односно развој или зацврстување на меѓународната професионална соработка.
Квалификувани апликанти се индивидуални уметници, професионалци од областа на културата или групи (од две до пет лица) со полни 18 години и со живеалиште во една од земјите кои учествуваат во програмата „Креативна Европа“.
Посебно се охрабруваат уметниците и професионалците од Украина да аплицираат за виртуелна мобилност.
Крајниот рок за поднесување на предлог-проектите е 31 мај 2023 година во 23:59 часот по средноевропско време.
Апликацијата се пополнува и се доставува онлајн преку порталот на Гете-апликацијата, за што е потребно да се креира корисничка сметка.
Повеќе информации за повикот може да најдете на следниов линк:
https://culture.ec.europa.eu/news/apply-now-new-culture-moves-europe-call-for-artists