Сите вработени во културата, почнувајќи со исплатата за септември, добиваат плати повисоки за 10 % како резултат на Општиот колективен договор за вработените во јавниот сектор постигнат оваа година.
Платите во културата, од почетокот на бранот покачувања во 2021 година, заедно со најновото покачување од септември 2023, се поголеми за 43 %.
Ваква динамика на зголемување на платите досега не е забележана во јавниот сектор во земјава, а до оваа драстична промена во полза на културните работници дојде со потпишувањето на Колективниот договор, кој во претходните 15 години беше постојано најавуван, за конечно да се реализира во 2019 година.
Договорот придонесе за правичност во групирањето на работните места, за праведна валоризација на трудот на вработените, за остварување на правата на додатоци на плата, за спречување на злоупотребата на вработените во културата, за спречување селективност и фаворизација во утврдување на правата од работен однос и за регулирање други релевантни прашања од работниот однос.
Благодарејќи на Колективниот договор, од 2020 година платите во културата беа зголемувани во неколку наврати, и тоа: за 1,65 % во 2021 г., за 19,55 % во 2022 г., за 12,55 % во март 2023 година.
Платите во културата оваа година се зголемуваат по вторпат за уште 10 %, а тоа е резултат на потпишувањето на Општиот колективен договор за платите во јавниот сектор, којшто гарантира континуиран раст на платите со решение кое нема да зависи од волјата и желбата на која било политичка партија и сега и во иднина.
Нагласуваме дека спроведувањето на Заклучокот на Владата за покачување на основната плата во јавниот сектор за 10 проценти што важи за целата држава се остварува во согласност со Општиот колективен договор. Имено, начинот на утврдување на основната бруто-плата е дефиниран во Колективниот договор за култура, а со поединечните решенија за плата само се констатира износот, се разбира зголемен за 10 % во согласност со член 14 од Општиот колективен договор.
Зголемувањето на платите во културата од 2021 до септември 2023 година најдобро се гледа од споредбата на податоците за неколку работни места и звања во дел од културните установи.