Копродукциската претстава „Отело“ќе го затвори 18. ИФАД „Стоби“  

од admin_kult

Претставата „Отело“ на режисерката Нина Николиќ,  копродукција на Македонскиот народен театар и БНП – Зеница од Босна и Херцеговина, ќе биде изведена  вечерва (17 август ) од 21 часот, на затворањето на 18. Интернационален фестивал на античка драма „Стоби“.

МНТ информира дека поради комплексноста, претставата ќе биде одиграна  на сцената на театарот „Јордан Хаџи Константинов-Џинот“ во Велес.

Претставата се игра во проза на два јазика, македонски и босански, а пристапот кон текстот ги  разработува темите кои се и денес актуелни, свежи и безвременски.

Шекспировата трагедија „Отело“ премиерно беше изведена на 16 ноември 2019 во БНП – Зеница, а пред скопската публика на 4 декември 2019 година. По изведбата во рамки на „Скопско лето“,  настапот на „Стоби“ ќе биде второ фестивалско претставување.

Во претставата играат актери од двете земји: Енес Салковиќ, Саша Ханџиќ, Дарја Ризова, Ѓорѓи Јолевски, Златан Шкољиќ, Aлександар Ѓорѓиески, Џенана Џаниќ, Тамара Миличевиќ-Стилиќ, Александар Михајловски и Аксел Мехмед. Сценографијата е на Вишња Вујовиќ, Ивана Каранфиловска-Угуровска е костимограф, а на сценските движења работеше Димитриос Сотириу. Текстот го преведоа Маја Трајаноска-Ивановска и Зина Агиќ, Крис Јегер работеше на дизајнот на светло, а композитор на музиката е Дуке Бојаџиев.

Осумнаесеттото издание на Интернационалниот фестивал на античка драма „Стоби“, на кој се изведуваат текстови од најпознатите антички драматурзи,  беше отворено на 3 август со премиeрата на „Орестија“. Годинава програмата траеше  две недели, а беа застапени две странски и четири домашни продукции, како и придружни настани – изложби, промоции на книги и филмски проекции на отворено.

 

 

Можеби ве интересира:

Страницата на Министерството за култура на Р.С.Македонија користи т.н."колачиња" со цел да обезбеди подобро корисничко искуство. Прифати Повеќе