Festivali i xhazit në Shkup ka vendosur që çmimin për muzikantin më të mirë të ri të xhazit maqedonas, i cili tradicionalisht çdo vit ndahet, këtë vit t’ia ndajë trios instrumentale të xhazit të Shkupit “Zulu 3.4”.
Në fakt, siç thonë nga atje, çmimi u jepet të gjithë anëtarëve të saj në mënyrë të barabartë, gjegjësisht Damjan Danevski (bateri), Mario Simonovski (kitarë) dhe Martin Dzorlev (tastierë).
“Ky është viti i tyre. Tingulli i tyre unik, origjinal, i pranishëm në tre albumet e tyre, u prezantua me sukses në podiume të shumta koncertesh brenda, por edhe jashtë vendit, duke fituar simpatinë e sinqertë të gazetarëve të muzikës dhe publikut”, thonë nga “Festivali i Xhazit në Shkup”.
“Zulu 3.4” është një grup instrumental nga Shkupi, i formuar në mars të vitit 2018 nga tre të apasionuar pas xhazit, qëllimi i të cilit është të krijojë një tingull unik përmes shkrirjes së stileve të ndryshme dhe të sjellë freski në skenën muzikore maqedonase. Ndonëse është një grup relativisht i ri, ata deri më tani kanë realizuar performanca të shumta dhe janë pas tre publikimeve origjinale: “FM to AM”, “Expandability” dhe “Fragments”.
Çmimi do t’u jepet të enjten (13 tetor) para shfaqjes së tyre në Qendrën Kulturore Rinore si pjesë e Festivalit të 41-të të Xhazit në Shkup.