Gjevgjelia është qytet i kulturës për vitin 2025, ka bërë të ditur ministri i Kulturës dhe Turizmit, Zoran Llutkov, i cili sot së bashku me sekretaren shtetërore Maria Gjorgova kanë vizituar institucionet kulturore në këtë qytet.
Ministri Llutkov kujtoi se Gjevgjelia është nikoqire e këtij manifestimi për herë të dytë, pas vitit 2011, dhe kjo konfirmon përkushtimin e qytetit që edhe një herë të jetë në qendër të ngjarjeve kulturore në Maqedoni.
“Kjo njohje nuk është vetëm nder, por edhe obligim. Ky është konfirmim se Gjevgjelia me traditën e saj të pasur kulturore do të jetë edhe një herë në qendër të ngjarjeve kulturore në Maqedoni. Ministria e Kulturës dhe Turizmit qëndron pas jush dhe e mbështet këtë manifestim me 3 milionë denarë, në mënyrë që të krijohet program me më shumë se 140 manifestime gjatë gjithë vitit, program ky që do të freskojë jetën kulturore në këtë qytet”, tha ministri Llutkov.
Llutkov ka vizituar edhe Çarshinë e Vjetër në Gjevgjeli, për restaurimin e plotë të të cilit nga buxheti i Qeverisë janë ndarë 40.675.095,00 denarë, që do t’i japë Gjevgjelisë dimension të ri vizual dhe funksional.
“Këto projekte do të përmirësojnë infrastrukturën dhe do të krijojnë hapësirë për ngjarje kulturore dhe projekte artistike, duke ushqyer traditën dhe inkurajuar trendet e reja kulturore”, tha Llutkov.
Sipas ministrit, Gjevgjelia me vendndodhjen dhe bukuritë e saj natyrore tërheq turistë të shumtë dhe tani, siç tha ai, me statusin e qytetit të kulturës do të ofrojë përvoja dhe mundësi të reja për kënaqësi.
Gjatë vizitës në Gjevgjeli, ministri Llutkov së bashku me nikoqirët e tij vizitoi I.N Muzeun- Gjevgjeli, Bibliotekën “Goce Dellçev”, si dhe kishën “Shën Atanasi” në fshatin Gabrovë.