По пауза од 5 години, локалниот археолошки и историски Mузеј „Теракота“ – Виница ги реализираше археолошките истражувања на локалитетот „Коколов рид“ во с. Виничка Кршла.
Раководител на истражувањата беше вишиот кустос археолог Јулијана Иванова, а во стручната екипа учествуваа вработените во Музејот, како и надворешни соработници за документација и стручна консултација.
– „Коколов рид“ повторно беше во фокусот на интерес на Музејот бидејќи сѐ уште нуди информации што би биле значајни за комплетирање на целосната слика за хронологијата и карактерот на археолошкото наоѓалиште кое е некропола и светилиште – информираат од Музејот „Теракота“. Оттаму додаваат дека истражувањата вршени во текот на оваа година открија нови моменти за периодот на раното бронзено време (втора половина на 3 милениум пр. н. е.) од праисторијата и нови откритија од периодот на 4 век – римски период.
DCIM100MEDIADJI_0160.JPG
– Резултатите од досегашните археолошки и конзеравторски истражувања се презентирани на симпозиуми во државава, во Србија и во Бугарија и се објавени како научни трудови во овие земји и во Португалија – додаваат од Музејот и најавуваат дека во следниот период следува кабинетска обработка на материјалот и превентивна конзервација на дел од керамичките и металните предмети.
Овие археолошки истражувања беа реализирани со поддршка од Министерството за култура.