Во Националната галерија, објект Чифте амам, денеска (3 ноември) во 19:00 часот ќе биде отворена јубилејната изложба „Ѓорѓи Зографски (1871 – 1945), 150 години од раѓање“.
Во рамките на изложбата ќе бидат претставени 50-ина дела (икони и слики) од сите творечки фази на авторот. Тие се дел од колекциите на: Националната галерија; Народниот музеј – Велес; црквите „Св. Пантелејмон“, „Св. Спас“, „Св. Димитрија“ и „Успение Богородичино“ – Велес; семејството Зографски; како и на голем број приватни сопственици.
Зографски, последниот зограф од семејството Рензовци, има значаен придонес за развојот на македонската ликовна уметност во втората половина на 19 и почетокот на 20 век.
Неговото творештво опфаќа портрети, историски композиции, пејзажи и мртва природа. Куратори на изложбата се Славица Алексоска и Маја Неделкоска-Брзанова.
Изложбата ќе трае до 26 ноември годинава.