По завршувањето на прикажувањата во Струга„ Неделата на новиот германски филм вечерва ќе продолжи во Скопје, во Летното кино „Мирно лето“ на Кинотеката, каде што посетителите ќе може да ги гледаат најновите остварувања на германската кинематографија.
Програмата вечерва во 20 часот ќе биде отворена со филмот „Undine“ на режисерот Кристијан Петцол, а до 7 септември ќе бидат прикажани уште шест филма, секој ден во истиот термин и на истата локација.
Паралелно со проекциите во Скопје, следуваат проекции и во Прилеп на 3 и 4 септември.
-Сите проекции на Неделата на новиот германски филм ќе бидат прикажани под отворено небо со целосно почитување на препораките за заштита од КОВИД-19. Влезот за сите проекции е бесплатен, а билетарата ќе биде отворена секој ден од 19 часот, соопшти организаторот.
Неделата на новиот германски филм годинава ја реализира Центарот за социјални иновации „Блинк 42-21“ во соработка со Кинотеката, „Дрим шорт“ – Струга и Центарот за култура „Марко Цепенков“ – Прилеп, со поддршка на Амбасадата на Германија во земјава.