Кралскиот колеџ во Лондон вечерва е централното место каде што се одбележува 30-годишнината од воспоставувањето на дипломатските односи со Обединетото Кралство на Велика Британија и Северна Ирска.
Во организација на Амбасадата на Северна Македонија и со поддршка од Министерството за култура, овој важен историски датум се одбележува со концерт на пијанистот Дино Имери, кој настапува со познатиот хрватски пијанист Ведран Јањанин.
Пред присутните гости, меѓу кои беше и специјалниот пратеник за Западен Балкан на британскиот премиер, Лорд Пич, министерката за култура Бисера Костадиновска-Стојчевска рече дека чинот на воспоставување дипломатски односи меѓу двете земји отвори ново поглавје во нашето пријателство, заемно почитување и искрена поддршка што ја добиваме од денот на нашата независност, на нашето осамостојување.
– Обединетото Кралство, како постојан член на Советот за безбедност и драгоцен поддржувач на нашето пристапување кон Обединетите нации, вложи искрени напори за надминување на спорот со соседна Грција и беше силен поборник за нашиот кандидатски статус во Европската Унија. Тоа и се случи. Статусот го добивме во 2005 година, за време на британското претседавање со Унијата. Во Лондон, практично, станавме и 30-та членка на НАТО – рече Костадиновска-Стојчевска.
Таа додаде дека во изминативе 30 години е остварена соработка во сите области, но Лондон, како моќен светски политички и економски центар, е предизвик и за културата.
– Да се освои и да се остави трага во него е повеќе од престиж. Оттаму, нема да ја скријам амбицијата дека сакаме да ја продолжиме и да ја зацврстиме соработката во културата и уметноста, да ги исползуваме можностите од Спогодбата за соработка и во областа на културата, спогодба која е во сила од пред 2 децении, како од многубројните билатерални договори за соработка во културата. Британската публика, позната по својот истанчен и пребирлив вкус за уметноста, со забележливо интересирање ја проследи поставката на Археолошкиот музеј на изложбата „Религиите во големите империи“ во Музејот „Ашмолеан“ во Оксфорд – истакна министерката за култура.
Костадиновска-Стојчевска пред аудиториумот во Кралскиот колеџ потсети дека македонската современа ликовна сцена беше претставена на изложбата „Made in Macedonia“ во Лондон. На фестивалот „Globe to Globe“ настапи Народниот театар од Битола со „Хенри VI“ на македонски јазик, а организаторите го оценија како еден од најдобрите на фестивалот. Во изминативе години пред лондонската јавност на Катедрата за славистика на престижниот Универзитетски колеџ беше промовирана едицијата „130 тома македонска книжевност“ преведена на англиски јазик.
Во лондонските престижни концертни сали, настапите на нашиот виртуоз Симон Трпчески секогаш се наградени со долготраен аплауз.
– Земјата на Шекспир беше дом и на нашиот модерен Шекспир, Горан Стефановски. Тој, и оваа вечер би ја направил посебна. Но, Северна Македонија во изминатите години со задоволство беше домаќин и на многубројни британски уметници на Ликовната колонија во Галичник, на „Скопскиот џез-фестивал“, во Националната филхармонија, на „Охридско лето“, на „Струшките вечери на поезијата“ – рече Костадиновска-Стојчевска. Таа го истака и значењето на преводите на делата од англиски на македонски јазик, кои се поддржуваат преку Министерството за култура, како и соработката во кинематографијата преку Агенцијата за филм.
Министерката за култура Костадиновска-Стојчевска зборуваше за големиот број македонски иселеници и студенти кои престојуваат во Обединетото Кралство и додаде:
– На наше големо задоволство, на една од најпрестижните образовни институции во Обединетото Кралство каде што се изучуваат словенски јазици, Универзитетскиот колеџ во Лондон, по пауза од 18 години, од 2019 година повторно се изучува македонскиот јазик. Им изразувам благодарност на сите кои работеа и успеаја во овој предизвик, особено на тогашните наши дипломати во Амбасадата во Лондон. На оние што ја посетуваат наставата им пожелувам со лесно да го научат убавиот македонски јазик.
На оваа свечена вечер за билатералните односи со Обединетото Кралство, гостите ги поздрави и специјалниот пратеник за Западен Балкан на британскиот премиер, Лорд Пич, кој е голем и искрен пријател на Северна Македонија и одличен познавач на околностите во земјава и во регионот.
– Во изминативе 30 години, исто така, ве поддржувавме и во сериозните активности, како што е приклучувањето на земјата во НАТО. Имав огромна привилегија да бидам присутен и на тој чин на приклучување во НАТО во 2020 година. Тоа е ден што никогаш нема да го заборавам. Значи станува збор за една многу сериозна релација меѓу нашите земји, којашто постојано се развива, меѓу кои се и трговската размена и постојаното зајакнување на соработката во делот на културата. Како што е, на пример, програмата за културна размена којашто е извонредна и многу малку земји се на нивото на оваа соработка и размена меѓу нашите две земји. И ова е израз на почитта што ние ја имаме кон жителите на вашата убава земја. Јас ја имам таа првилегија често да ја посетувам вашата земја и секогаш сум импресиониран од квалитетот што го поседуваат младите луѓе, од нивната енергија, од ентузијазмот во работата. И, секако дека вечерашниов настан ќе биде само уште еден дополнителен настан на овој долг список на успешна соработка и големи успеси, како што е овој музички концерт – рече во своето обраќање Лорд Пич.
Вечерта продолжи со концертот на пијанистот Дино Имери со хрватскиот повеќенаградуван пијанист Ведран Јањанин, а на програмата беа дела од македонски автори, како и дела од Густав Холст, Сергеј Рахманинов и Витолд Лутославски и Дијана Имери-Илкоска.
Културната програма беше заокружена во Македонската амбасада во Лондон со изложба на 17 уметнички дела од уметницата Жанета Гелевска-Жани, создадени во последниве неколку години во оваа светска културна метропола.