Со свечено доделување на признанијата, во Велес беше спуштена завесата на 57-то издание на Меѓународната поетска манифестација „Рацинови средби“. Македонскиот писател Томислав Османли ја доби највисоката награда, која му ја донесе неговата 28. книга „Парадоксикон“, а финскиот лингвист Јоуко Сакари Линдстет и американскиот македонист Виктор Фридман го добија почесното „Рациново признание“.
Во рамките на Манифестацијата, традиционално и годинава се одржа меѓународниот поетски митинг на кој покрај македонските поети, и поетите од странство, преку видео, рецитираа свои песни. Во рамките на „Рациновите средби“ се одржаа и две меѓународни конференции посветени на 75 години современ македонски јазик и на творештвото на Горан Стефановски, неколку промоции на книги и посети на родната куќа и вечното почивалиште на Коста Солев Рацин.
Во двете вечери се одржаа и концертите на групата „Синтезис“ и на Градскиот камерен оркестар од Велес.