Filmi maqedonas “Dixhej Ahmet” i Georgi Unkovskit pati një sukses të madh, duke pasur premierën botërore në Festivalin prestigjioz të Filmit Sundans, ku fitoi çmimin special të jurisë për vizionin kreativ dhe çmimin e publikut.
Filmi tashmë është shitur në Kanada, Australi, Zelandën e Re, Belgjikë, Luksemburg, Holandë, Portugali, Spanjë, Izrael dhe në të gjithë ish-Jugosllavinë, raporton “Varajati”, duke shtuar se negociatat janë duke u zhvilluar për territore të tjera.
“Dixhej Ahmet” është një dramë për një djalë 15-vjeçar nga një fshat Juruk në Maqedoninë Lindore, i cili gjen strehë në muzikë dhe ëndërron të bëhet Dixhej ndërsa përballet me pritjet e babait të tij, një komunitet konservator dhe përvojën e tij të parë me dashurinë – një vajzë që tashmë i është premtuar dikujt tjetër.
Filmi është bashkëprodhim i “Sinema Futura” dhe “Sektor Film” nga Maqedonia, “Alter Vision” dhe “Analog Vision” nga Republika Çeke, “Bekrum Production” dhe “Bash Çelik” nga Serbia. Producentët e filmit janë Ivan Unkovski dhe Ivana Shekutkoska.
Filmi është mbështetur nga Agjencia e Filmit.