Mbrëmjen e djeshme në hamamin e Daut Pashës u hap edicioni i 11-të i Festivalit Ndërkombëtar Letrar “PRO-ZA Ballkan”, ku u prezantuan veprat e autorëve të shquar nga rajoni. Në hapje morën pjesë shkrimtarët Drago Jançar, Renato Baretiç, Danica Vukiçeviq, Sllobodan Shijan, Vlladimir Levçev, Tarik Tufan dhe Snezhana Mlladenovska-Angjellkov. Me shkrimtarët e ftuar folën Aleksandar Prokopiev dhe Ermis Llafazanovski.
Festivali “PRO-ZA Balkan” këtë vit shënon 10-vjetorin e programit “Skopje Follouship”, në të cilin marrin pjesë shtatë profesionistë nga agjencitë më të mira letrare dhe shtëpi botuese. Programi i këtij viti është pjesë e projektit ndërkombëtar “Lexo, shpërndaje, gëzohu!”. Realizohet në bashkëpunim me SHKA “Sodobnost” nga Sllovenia, dhe bashkë-financohet nga programi “Evropa kreative” të Bashkimit Evropian. Në program do të marrin pjesë Roberto Domingez Moro (A.C.E.R., Spanjë), Marija Angjella Ferrari (“Sassi Editore”, Itali), Nika Mushiç (SHKA “Sodobnost”, Slloveni), Oreli Bontu-Rosh (“Libela”, Francë) , Mauro Spanjol (“Books everywhere”, Itali), Jorg Zundermajer (“Ferbrecher Ferlag”, Gjermani) dhe Andrea Xhentile (“Il Saggatore”, Itali).
Anëtarët e programit “Skopje Follouship” sot dhe nesër (18 dhe 19 shtator) do të takohen me përfaqësues nga Shoqata e Botuesve të Maqedonisë dhe botues të tjerë vendorë. Anëtarët e programit do të kenë mundësinë të informohen edhe për konkursin për financimin e përkthimeve të botuesve të huaj nga Ministria e Kulturës.
Sonte (18 shtator) në ora 20:00 në Shtëpinë Evropiane në Shkup do të mbahet tryezë e rrumbullakët me temën “Letërsia si (de)konstruksion i realitetit”, të cilën do ta udhëheq Vlladimir Jankovski. Për nder të regjisorit Sllobodan Shijan, më 20 shtator në orën 20:00 në kinotekë do të shfaqet filmi “Kush këndon atje”. Para shfaqjes do të bisedojnë Prokopiev dhe Shijan.
Fituesi i çmimit “Prozart 2023”, të cilin festivali ia jep një autori të shquar për kontributin e tij në zhvillimin e letërsisë në Ballkan, është shkrimtari slloven, Drago Jançar.