Ekspozita retrospektive e artistes Aneta Svetieva, një nga artistet më të rëndësishme bashkëkohore maqedonase, u hap dje në Galerinë Kombëtare të Maqedonisë, në Hamamin e Daut Pashës.
Para të ftuarve të shumtë, përfshirë Presidenten Gordana Siljanovska Davkova, të pranishmëve iu drejtua Sekretarja e Shtetit në Ministrinë e Kulturës dhe Turizmit, Marija S. Gjorgova.
Është nder dhe privilegj, tha Gjorgova, të marrë pjesë në një ekspozitë të Aneta Svetievë, artiste që ka rol jashtëzakonisht të rëndësishëm në artin bashkëkohor maqedonas.
“Aneta nuk është vetëm skulptore. Ajo është rrëfimtare përmes formës, dëshmitare e kohës dhe roje e shtresave të thella kulturore që formësojnë identitetin tonë. Rruga e saj krijuese fillon në vitet 1960, por edhe sot arti i saj rrezaton freski, thellësi dhe forcë shpirtërore. Gjithmonë besnike ndaj zërit të saj të brendshëm, ajo nuk ndjek trendet, por krijon botë. Veprat e saj flasin për rrënjët, për zakonet, për mitologjinë, jo si nostalgji, por si dialog i gjallë me modernitetin”, tha Gjorgova.
Aneta Svetieva përfaqësoi Maqedoninë edhe në skenën më prestigjioze ndërkombëtare – Bienalen e Venedikut, ku u njoh për shprehjen e saj autentike dhe thellësisht njerëzore.
Ekspozita u pasurua edhe me një monografi të botuar nga Galeria Kombëtare, të përgatitur nga Viktoria Vaseva- Dimeska, e cila, siç tha Gjorgova, plotëson krijimtarinë që meriton të ruhet dhe t’u kalohet brezave të ardhshëm.
Ekspozita do të zgjasë deri më 31 gusht.