Ministri i Kulturës dhe Turizmit, Zoran Llutkov, mbrëmë në Çifte Hamam në hapjen e ekspozitës “Vepra franceze nga koleksioni i muzeut Osten” tha se Maqedonia është vend që politikën e saj ndërkombëtare kulturore e bazon në çiltërsinë dhe respektin ndaj kulturave të tjera, dhe ne duhet të vazhdojmë së bashku përmes kulturës të shkruajmë faqe të reja në miqësinë maqedonase-franceze.
“Franca është partneri dhe mbështetësi ynë i dëshmuar dhe me ekspozitën që po marrim pjesë sonte po shkruajmë faqe të reja në miqësinë maqedonase-franceze. Kjo është një mundësi vërtet e bukur për të dhënë kontributin tonë në realizimin e përkushtimit tonë strategjik për promovimin dhe zhvillimin e dialogut ndërmjet kulturave”, tha ministri Llutkov.
Duke uruar 50 vjetorin e Institutit Francez, Llutkov theksoi rëndësinë dhe kontributin e tij të madh në realizimin e shumë manifestimeve si pjesë e programeve të institucioneve në fushën e kulturës.
“Ky institucion diskret dhe me ndikim vendosi standardet e bashkëpunimit evropian në kulturë dhe arsim 50 vjet më parë dhe ndërtoi breza të rinjsh që ndajnë ato vlera dhe luajnë rol të rëndësishëm në shoqërinë tonë. Kontributi i Institutit Francez është i madh në bashkëpunimin me institucionet e kulturës, të cilat shënuan histori në programet e tyre me ngjarje të mbështetura nga Instituti Francez”, tha Llutkov.
Ekspozita nga koleksioni francez i “Osten” është manifestimi përfundimtar i kremtimit të 50 vjetorit të Institutit Francez në Shkup.