Dita e pestë e edicionit jubilar të 15-të të Festivalit të filmit dokumentar kreativ “MakeDox” do të fillojë me hapjen e edicionit të gjashtë të forumit MakeCoProDox, i cili do të mbahet nga 19 deri më 21 gusht në QKM. Forumi do të hapet sonte me prezantimin e projekteve dhe autorëve pjesëmarrës në punëtorinë për praktikat arkivore në film, “Paramendimi i arkivave” në MakeDox 15, moderuar nga Kumjana Novakova dhe Vllad Petri.
Qëllimi kryesor i forumit është zhvillimi i një plani strategjik për rritjen e bashkëproduksioneve të filmave dokumentar midis vendeve të Ballkanit. Forumi mbledh në një vend përfaqësues nga qendrat rajonale të filmit, profesionistë nga fusha e filmit dokumentar dhe nga industria e filmit dhe 9 projekte që janë në faza të ndryshme prodhimi, të përzgjedhura përmes thirrjes së hapur.
Në kuadër të programit filmik sonte (19 gusht) në Kurshumli Han, me fillim nga ora 21:00, do të bëhet premiera maqedonase e filmit dokumentar “Heshtja e arsyes” nga Kumjana Novakova. Duke marrë parasysh temën komplekse, filmi i Novakovës deri më tani ka fituar çmimin “Zemra e Sarajevës” për të drejtat e njeriut, çmimin për regjinë më të mirë në IDFA në Amsterdam, çmimin për filmin më të guximshëm në Festivalin e filmit të autorit në Beograd, jurinë speciale në Festivalin e filmit në Torino dhe shumë të tjerë. Si projekt filmik, ai u mbështet nga një grant artistik i BIRN-it dhe është bashkëproduksion maqedonas-boshnjak.
Në oborrin përballë Muzeut të Republikës së Maqedonisë, sonte (19 gusht), në ora 20:30 do të shfaqet filmi etnologjiko-dokumentar “Hemboy” i prodhuar nga ky institucion kombëtar, autore e të cilit është etnologia Elizabeta Koneska. I filmuar në Çarshinë e Vjetër të Shkupit, ku ende lyhen xhaketa të vjetra, pantallona, këmisha dhe lloje të tjera të pëlhurave, tregon tre brezat e familjes Neziri që punojnë në këtë zeje dhe drejtojnë dyqanin që e morën nga familja Bojaçiev. Ky është një film për trashëgiminë e zejeve dhe traditave në Shkupin multi-etnik.