Ministri i Kulturës dhe Turizmit, Zoran Llutkov, sot ka pritur në takim drejtoreshën e Këshillit britanik për rajonin, Kler Srs dhe zëvendësambasadoren e Britanisë së Madhe, Julia Smit.
Në atmosferë miqësore dhe konstruktive, në takim u diskutua për vazhdimin dhe forcimin e bashkëpunimit në drejtim të zhvillimit të industrive kreative.
Llutkov dhe Srs, duke iu referuar përvojave të mëparshme dhe prioriteteve aktuale të Ministrisë, u pajtuan se ekziston një hapësirë e madhe për promovim dhe zhvillim në sferën e industrive kreative si një degë që sjell përfitime ekonomike dhe inkurajon praktikuesit kreativ për të realizuar idetë e tyre dhe të krijojnë produkte që do të kenë vlerë estetike, praktike dhe të zbatueshme, dhe do të jenë të qëndrueshme në treg.
Në takim u diskutua për mundësinë e rritjes së mbështetjes, veçanërisht në dizajnin e modës, si një nga më fitimprurësit në sektorin kreativ.
Bashkëbiseduesit ndanë përvojat e suksesit të forumeve ndërkombëtare për ndërmarrësi kreative kulturore, organizuar nga Unioni i Shoqatave Profesionale Maqedonase në Industritë Kreative (UMPAKI), duke paralajmëruar edicionin e ri të Forumit për nëntor të këtij viti.
Duke pasur parasysh integrimin e turizmit në Ministrinë e Kulturës dhe Turizmit të Maqedonisë, u shqyrtuan perspektiva të reja për intensifikimin dhe zgjerimin e modeleve për bashkëpunim të ndërsjellë në drejtim të fuqizimit të turizmit kulturor.
Në takim, pala britanike shprehu gatishmërinë e madhe që me kapacitetet dhe përvojat e veta të ndihmojë në realizimin e projektit “Shkupi – kryeqyteti evropian i kulturës”.