Programi muzikor i edicionit të 64-të të festivalit “Vera e Ohrit” vazhdon sonte (16 korrik 2024) me koncertin e Gerhard Reichenbach, një prej kitaristëve klasikë gjermanë.
Koncerti do të mbahet në kishën “Shën Sofia” me fillim nga ora 21:00.
Reichenbach debutoi si solist në vitin 1980 në Dusseldorf dhe në skenën ndërkombëtare performoi për herë të parë në vitin 1990 në Festivalin e Kitarës në Volos, Greqi. Që atëherë, për më shumë se 40 vjet ai bën koncerte si solist, me një orkestër dhe në festivale të shumta që e kanë sjellë, ndër të tjera, në skenën e Filarmonisë së Berlinit dhe në Shtëpinë Ndërkombëtare të Muzikës në Moskë.
Repertori i këtij artisti përfshin më shumë se 35 recitale dhe koncerte të shumta për kitarë dhe orkestër.