Во галеријата на македонскиот Културно-информативен центар во Софија, Бугарија, денеска, вторник (14 мај), од 18:30 часот, ќе се одржи промоција на преводот на романот „Сфинга на гневот“ од македонскиот писател Жарко Кујунџиски.
Книгата, со превод на бугарски од Маријан Петров, деновиве излезе од печат како издание на реномираната издавачка куќа „Персеј“ од Софија. Преводот е поддржан од книжевната мрежа „Традуки“.
Романот „Сфинга на гневот“, во присуство на авторот Жарко Кујунџиски, ќе го промовираат литературниот критичар и издавач Пламен Тотев и писателот и преведувач Маријан Петров.
„Сфинга на гневот“ беше во потесниот избор за наградите „Роман на годината“, „Рациново признание“, „Стале Попов“ и е македонскиот избор за наградата „Балканика“ за 2021 година.
Романот досега е објавен во три изданија и е преведен на албански и на бугарски јазик.