Во просториите на „Европска куќа“ во Струга денеска ќе биде прогласен добитникот на наградата „Млада Струга“ за 2024 година. Оваа награда се доделува за најдобра необјавена поетска збирка од млад автор дебитант, на возраст од 18 до 30 години.
Наградата се доделува во рамките на Фестивалот „Струшки вечери на поезијата“ (СВП), а во соработка со „Европска куќа“ и со поддршка од Делегацијата на Европската Унија во земјава.
Конкурсот за поетската награда „Млада Струга“ за 2024 беше распишан на 9 мај и беше отворен заклучно со 14 јуни.
Оваа година наградата „Млада Струга“ беше возобновена преку соработка на „Струшките вечери на поезијата“ со Делегацијата на ЕУ, којашто од оваа година ќе биде покровител на наградите „Енхалон“ и „Млада Струга“ преку „Европска куќа“ –Струга, најновата членка на мрежата на „Европска куќа“.
Oсвен паричен износ, наградата вклучува и објавување на поетската збирка како дел од изданијата на „Струшките вечери на поезијата“ и учество на Фестивалот, по примерот на поранешниот конкурс на Книжевната младина на Македонија.