Во Офицерскиот дом и во киното „Манаки“ во Битола денеска и утре се одржува форумот на УНЕСКО – Креативни филмски градови, на тема „Зајакнување на улогата на жената во аудиовизуелните медиуми“.
На отворањето на форумот присуствуваше и заменик-министерот за култура Даим Лучи, кој во своето обраќање истакна дека дискусијата дава одлична можност да се разговара за актуелно прашање како што е родовата еднаквост во аудиовизуелните медиуми.
„Иако се вели дека добрата уметност нема род, сепак е значајно да се отвори и оваа дискусија поради тоа што кога се споменува филмската индустрија, честопати се мисли како на ’машки свет‘. Во нашата држава жените авторки со својата работа ги менуваат овие стереотипи, а во последните години тие се едни од најголемите промоторки на македонската култура во светски рамки“, рече заменик-министерот Лучи.
Тој додаде дека имаме многубројни добитнички на реномирани награди на филмските фестивали во светот, што е за голема почит и изрази уверување дека овој тренд ќе продолжи и во иднина, а жените авторки ќе го освојат местото што го заслужуваат и ќе имаат уште поголема поддршка од филмскиот сектор.
„Учеството на нашата држава и на Битола во мрежата на УНЕСКО на креативни градови за филм“, рече заменик-министерот, „е од витално значење за вреднување на културата како место за промоција и отворање многу нови можности за соработка во филмската уметност.“
![](https://kultura.gov.mk/wp-content/uploads/2022/11/thumbnail-1024x683.jpeg)
Честитајќи им на организаторите, Здружението за филмска уметност „Центар за филм“ од Битола, Лучи потенцираше дека Министерството за култура во континуитет ги препознава и ги вреднува нивните напори и посветеност за зголемување на соработката меѓу градовите во областа на филмската уметност.
Во рамките на програмата на форумот, денеска беа прикажани и долгометражните играни филмови „Враќање“ на режисерот Кастриот Абдили и „Втора шанса“ на режисерката Марија Џиџева.
За време на форумот беа вклучени високи претставници на креативните градови за филм од мрежата на УНЕСКО – Тераса, Лоѓ, Потсдам, Ваљадолид, Гдиња, Софија, како и претставници од домашните релевантни институции, невладиниот и бизнис-секторот кои работат во аудиовизуелните медиуми, како: Агенцијата за филм, Агенцијата за аудио и аудиовизуелни медиумски услуги, Македонската радио-телевизија, телевизија „Телма“ и други.
Форумот има исклучителна важност за градот Битола, како рамноправен член на креативните градови за филм од мрежата на УНЕСКО од 2015, и е еден од 21 град кои се дел од овој филмски кластер на УНЕСКО, единствен од земјава и еден од ретките од регионот заедно со Софија и Сараево. Мрежата е клучен партнер на УНЕСКО.