– „Скопје – Европска престолнина на културата во 2028 година“ e престижна титула, но и голема обврска, а она што можам да го видам од работењето на тимот е дека ни следува еден многу креативен период. Навистина сум многу среќна бидејќи во културата ни требаше една светла точка, која ќе биде водилка на сите институции да се обединат за да останеме светла точка до 2028, но и потоа, која ќе не држи будни со цел уште повеќе да се развие македонската култура. Тоа ќе биде шанса да придонесеме со нашите вредности во ЕУ, претставувајќи ги како вредности нашата традиција, нашата култура и особеностите – рече министерката за култура Бисера Костадиновска-Стојчевска во гостувањето на МРТ1.
– Огниште околу кое сите ќе се сплотат, токму таква е оваа титула, инклузивна. Ова не е само наш проект чие мото е „Културата над поделбите“ туку заеднички, без оглед на политички партии, националности и градови. Затоа културата има примат, со неа можеме да ги надминеме сите пречки за да ја покажеме нашата уникатност – рече министерката.
Според неа, оваа титула, доделена од експерти од Европската комисија, претставува предизвик за обединување под знамето на културното просветлување, овозможувајќи им не само на Скопје и неговите жители туку и на сите македонски граѓани да почувствуваат подлабока поврзаност со поширокиот европски идентитет.
– Патувањето кон 2028 година бара непоколеблива поддршка и финансиски и кадровски и инфраструктурно.
Владата, преку Министерството за култура, е посветена на безрезервна поддршка на иницијативата „Скопје – Европска престолнина на културата во 2028“. Овој потфат гарантира долгогодишно инвестирање и непоколеблив напор да се осигури дека Скопје ќе блесне силно на европската културна мапа. Повикот е упатен до сите културни работници, уметници, иновативни умови и секој сектор од општеството да ги здружат силите, искористувајќи го нашиот потенцијал за да создадеме незаборавен наратив за културното богатство – појасни Костадиновска-Стојчевска.
Таа додаде дека Универзалната сала ќе биде реконструирана колку што е можно поскоро не само затоа што е носител на овој проект туку и бидејќи сме единствен град што извесен период нема концертна сала.
– Советот на Град Скопје донесе одлука ингеренциите за реконструкција да бидат пренесени на Министерството за култура. По добивањето на документите од правната служба на Град Скопје, ќе направиме увид иако начелно имаме стручен тим и надворешни експерти кои ќе дадат насоки како да се продолжи реконструкцијата. Средствата се обезбедени за надворешната реконструкција, останува уште да се обезбедат средства за ентериерот, и да не ја чекаме 2028 година, туку што поскоро да ја видиме салата во полн сјај – заклучи Костадиновска-Стојчевска.