Под мотото „Рацин без компромис“, со сценски перформанс во Спомен-костурницата и со врачување на наградата „Рациново признание“ на писателот Блаже Миневски, во Велес започна јубилејното 60. издание на меѓународната поетска манифестација „Рацинови средби“.
На свеченото отворање присуствуваше и кабинетската советничка Оливера Ливриниќ, која заедно со делагациите од Општината, институциите и училиштата оддадоа почит на еден од основоположниците на современата македонска книжевност и на идеите за слобода, Коста Солев Рацин.
Манифестацијата, која одбележува значаен јубилеј во јубилејната година на Рацин, 80 години од смртта на поетот и револуционер, до 15 јуни ќе понуди бројни содржини.
Во Народниот музеј во Велес денеска во 12 часот ќе се одржи и Научен симпозиум на Институтот за македонски јазик „Крсте Мисирков“.
![](https://kultura.gov.mk/wp-content/uploads/2023/06/347248441_652751630218697_6716788485014360790_n-1024x682.jpg)
Во 20 часот, во амфитеатарот во Велес пак премиерно ќе биде прикажана ТВ серијата посветена на Кочо Рацин, „Црвениот поет“, во режија на Никола Поповски и по сценарио на Сашко Насев. Прикажувањето на серијата, која е во продукција на „Сектор филм“, ќе се одвива и во вторник и во среда во вечерните часови.
Во вторник пак, на програмата е предвидена посета на планината Лопушник, местото на загинување на Рацин и пречекување на ултрамаратонците. На споменикот на Лопушник ќе има и поетски читање на стиховите на Рацин. И во среда, под мотото „Уметност без компромис“, во Градскиот парк во Велес ќе се одржи поетско читање на млади автори, а во Куќата на Рацин предвидено е поетско читање на авторите кои се гости на овој фестивал.
Свеченото затворање на манифестацијата ќе биде на 15 јуни, кога ќе биде врачено и „Почесното Рациново признание“ на литературниот критичар, истражувач, издавач од Бугарија, Пламен Тотев.