Многубројни гости од Тирана, од јавниот и од културниот живот, дипломати од повеќе земји – од Германија, Јапонија, Велика Британија, од Франција – се собраа во петокот вечерта во Македонскиот културно-информативен центар во Тирана на отворањето на изложбата на Зоран Кардула.
![](https://kultura.gov.mk/wp-content/uploads/2022/04/Zamenik-3.jpg)
Изложбата ја отворија заменик-министерот за култура на Република Северна Македонија, Даим Лучи, амбасадорот на Република Северна Македонија во Албанија, Данчо Марковски, како и директорот на КИЦ – Тирана, Златко Ориѓански.
Заменик-министерот Лучи на отворањето посочи дека оживувањето и промовирањето на уметничките и културните вредности во странство останува една од заложбите на Министерството за култура.
![](https://kultura.gov.mk/wp-content/uploads/2022/04/foto-nova-odbrana-1.jpg)
Делата на Зоран Кардула, еден од најреномираните македонски современи уметници, графички дизајнер, кој веќе 20 години ја привлекува јавноста со својата естетика и актуелност, добија нова потврда за нивната вредност, што се манифестираше со реакциите на публиката. Специјалитетот, крушевски локум, и атмосферата со диџејот Узун Баба беа дел од автентичноста на вечерта за што се погрижија директорот на Македонскиот КИЦ, Златко Ориѓански, и уметникот Кардула. Изложбата ќе биде отворена во следните неколку месеци.
![](https://kultura.gov.mk/wp-content/uploads/2022/04/Zamenik-4.jpg)
Во рамките на работната посета на Тирана, заменик-министерот Лучи, освен со својата колешка Мери Кумбе, заменик-министер за култура на Албанија, се сретна и со градоначалникот на Тирана, Ерион Велиај. На состанокот, кој беше пријателски и конструктивен, се разговараше за координирање на младинските и на културните активности, како и за создавање мостови на комуникација и соработка во областа на културата и младите.