Со концерт на реномираното македонско трио „Аперто“, Македонскиот КИЦ во Загреб свечено ја отвори концертната програма за 2026 година. Публиката со воодушевување го проследи настапот на Марина Трајковска – виолина, Момчило Куфојанакис – виолина и Весна Ангелова Христов – пијано, кои се препознатливи по своите врвни камерни изведби.
Директорката на КИЦ, Мими Ѓоргоска Илиевска, истакна дека и оваа година програмата ќе биде насочена кон промоција на современата македонска уметност, културното наследство и продлабочување на културната соработка меѓу Македонија и Хрватска. На концертот присуствуваше и македонскиот амбасадор во Хрватска, Драган Ѓурчевски.
Концертот понуди внимателно избрана програма со дела од македонски, хрватски и светски композитори, меѓу кои: Б. Цанев, Б. Светиев, Б. Илин, А. Божиќ-Кудриќ, М. Мошковски, Г. Форе и А. Шнитке. Настанот, поддржан од Министерството за култура и туризам, уште еднаш ја потврди улогата на Македонскиот КИЦ во Загреб во афирмацијата на македонската култура на меѓународната сцена.
