Вчера, 18 мај 2026 година, по повод Меѓународниот ден на музеите, во НУ Музеј на РС Македонија – Скопје се одржа свечено отворање на изложбата „Вода: Од исконски верувања до современ пулс“. Автор на изложбата е Јован Шурбаноски, а коавтор Александра Папазовска.
Преку археологијата, етнологијата и уметноста, посетителите имаа можност да патуваат низ времето и културите, откривајќи ја водата како многу повеќе од природен елемент – како сведок, инспирација и движечка сила на човештвото.
Изложбата, реализирана во соработка со НУ Археолошки музеј на РС Македонија – Скопје и НУ Музеј „Д-р Никола Незлобински“ – Струга, ја претставува водата како духовен медиум и симбол што го обликува идентитетот на заедниците низ историјата.
„Вода: Од исконски верувања до современ пулс“ носи приказна за цивилизацискиот развој, за занаетите што ја скротуваат природата, за движењето и спортот, како и за трансформацијата на водата во моќ и културно наследство.
Посетителите имаа можност да го препознаат сопствениот одраз во „синиот отпечаток на вечноста“ – таму каде што секоја капка сведочи за минатото, а секој бран најавува нов подем.
