Денеска ќе биде одржано традиционалното дефиле под маски, со кое ќе биде оживеан Вевчанскиот карневал, привлекувајќи бројни посетители од земјата и странство. Под звуците на музика и во весела атмосфера, маскираните учесници ќе продефилираат низ улиците на Вевчани, прикажувајќи креативни, сатирични и автентични маски инспирирани од актуелни општествени теми, народни верувања и вековната карневалска традиција.
Вевчанскиот карневал, познат по својата уникатност и слобода на изразување, и годинава ќе потврди зошто е еден од најпрепознатливите културни настани во Македонија. Дефилето под маски ќе претставува срцето на карневалот, симбол на народниот дух, хуморот и отпорот кон секојдневието, пренесуван од генерација на генерација.
