Канцеларијата на Креативна Европа МК, во соработка со „Beach Film Festival“ и полската експертка Ана Хут – член на Одборот на Европската филмска академија, доцент на Школата за филм „Кешловски“ (Kieślowski Film School) и официјален оценувач за програмата Креативна Европа МЕДИА – организира работилница на тема „Стратегии за планирање филмски фестивал и презентирање пред продажни агенти“, наменета за зајакнување на капацитетите на домашниот филмски сектор.
Настанот ќе се одржи на 23 јули 2026 година (четврток), во уникатен амбиент на бродот „Армада“ во Охрид, со почеток во 17:00 часот.
Работилницата е дел од континуираните активности на Канцеларијата на Креативна Европа МК насочени кон јакнење на капацитетите на домашниот аудиовизуелен сектор и зголемување на искористеноста на можностите што ги нуди потпрограмата МЕДИА на Креативна Европа за македонските филмски професионалци.
Во рамките на работилницата ќе бидат презентирани конкретните можности и механизми за финансиска поддршка на филмските фестивали што ги нуди програмата Креативна Европа МЕДИА, со посебен акцент на повиците „Филмски фестивали“ и „Мрежи на филмски фестивали“.
Учесниците ќе имаат можност да се запознаат и со европските искуства во областа на стратешкото планирање и развој на филмските фестивали, како и со пристапите за успешно претставување филмски проекти пред продажни агенти и меѓународни партнери.
