Во организација на Министерството за култура и туризам – Канцеларија за Креативна Европа, во соработка со Фестивалот за креативен документарен филм „16. Македокс“, денеска во просториите на Младинскиот културен центар се одржа работилница посветена на повикот за „Европски мини слејт развојни проекти“ на потпрограмата „МЕДИА“.
Работилницата ја водеа реномираните хрватски експерти Тамара Бабун Зовко и Матија Дрниковиќ од продуцентската куќа „Волфганг и Доли“ (Wolfgang & Dolly), познати по своето богато искуство во подготовка и реализација на проекти од овој тип.
По завршувањето на работилницата, како и на 28 август, заинтересираните продуценти кои имаат намера да аплицираат на тековниот повик за „Европски мини слејт развојни проекти“ (со краен рок 17 септември 2025 година), имаа можност да остварат индивидуални консултативни средби со експертите и со претставниците на Канцеларијата за Креативна Европа – МЕДИА.
Работилницата беше наменета, пред сѐ, за продуцентите кои активно работат на подготовката на апликации за повикот и понуди практични насоки и вредни совети за успешно аплицирање.
