Од 30 август до 5 септември 2025 г., по 17. пат ЦК „Марко Цепенков“ ќе ја реализира Меѓународната ликовна колонија „Марко Цепенков – Дрен 2025“, на која ќе учествуваат 17 уметници од земјава, од Хрватска и од Србија.
Годинава уметниците ќе творат на слободна тема во преубавата природа на манастирот „Св. Ѓорѓија“, над езеро, а новите уметнички дела ќе бидат дел од богатата збирка на Центарот. Создадените дела на годинашната колонија ќе бидат презентирани на изложба во Центарот во ноември.
На колонијата ќе учествуваат уметниците: Јуре Кокеза, Звјездана Јембрих, Злата Томљеновиќ, Звонко Павличиќ, Снежана Манасиќ, Стефан Анчевски, Васко Горѓиев, Дејан Макаријоски, Верче Николоска, Александар Џинго, Ферди Булут, Марјан Стојаноски, Златко Крстески, Емил Димоски, Слободан Милошевски, Ристе Мицевски и Бојана Тошевска.
Колонијата се реализира со финансиска поддршка од Министерството за култура и туризам, а досега збирката на слики и скулптури создадени на колонијата го надминува бројот од 430 дела.