Во петок, 21 август, започнува 38. издание на меѓународната манифестација „Поетска ноќ во Велестово“, која ќе трае до 23 август. Програмата ќе се одвива во Велестово и во„Лапидариумот“ во Охрид, со учество на дваесетина поети, музичари и уметници од седум земји.
Фестивалот ќе започне во 21 часот со поетски портрет на Јовица Ивановски, по што ќе следува интернационалното поетско читање „Имаго“. Во 22:30 часот ќе биде отворена изложбата на акварели „Флора“ од Ивана Настески.
Во следните два дена се предвидени промоции на пет поетски збирки, интернационални читања „Мозаик“, како и настапи на автори од Ирска, Хрватска, Србија, Црна Гора, Бугарија, Романија и Македонија. Програмата вклучува и музички настап на Иван Христов и Петар Чухов, како и организирано разгледување на културно-историското наследство на Охрид и природните убавини на Галичица.
„Поетска ноќ во Велестово“, основана од поетот Славе Ѓорго Димоски, со години ги поврзува поезијата, музиката и визуелната уметност во автентичниот амбиент на Велестово.