Министерството за култура и туризам учествува на меѓународниот туристички саем ITB Asia во Сингапур, со цел афирмација на туристичките потенцијали на Република Северна Македонија, зголемување на нејзината видливост на азискиот пазар и воспоставување нови меѓународни партнерства.
На саемот, Македонија се претставува како дестинација со богата и разновидна туристичка понуда, која ги обединува природните убавини, културното наследство, историјата, авантуристичкиот туризам и гастрономијата.
Од Охридското Езеро, заштитено од УНЕСКО, до планинските предели, традиционалните села, автентичната локална кујна, квалитетните вина и препознатливото гостопримство, земјата нуди можности за уникатни туристички доживувања во текот на целата година.
Учеството на ITB Asia е можност за воспоставување и зајакнување на контактите со туроператори, туристички агенции, авиокомпании и други чинители во меѓународниот туристички сектор. Особено значајно е поврзувањето со регионалните туристички понуди и нејзиното вклучување во туристички аранжмани за Западен Балкан и Европа, наменети за посетителите од азиските пазари.
На македонскиот штанд се претставуваат македонските туроператори „Ајдинис травел“, „Балкан Прајм Турс“, „Македонија турист“, „Бадемтур“ и „Камелија“, кои имаат можност да ги промовираат своите услуги и да воспостават контакти со потенцијални меѓународни партнери.
ITB Asia е значајна платформа за меѓународно поврзување, размена на искуства и создавање деловни партнерства во туристичкиот сектор. Преку учеството на овој саем, Министерството за култура и туризам ја потврдува својата заложба за отворање нови пазари, поддршка на домашните туристички субјекти и поттикнување одржлив развој на туризмот.
