Националниот џез-оркестар вечер во 21 часот на сцената „Долни Сарај“ ќе го изведе концертот „Македонски сновиденија“, во рамките на 66. „Охридско лето“. Со Оркестарот ќе диригира маестро Владимир Николов, а специјален гостин ќе биде трубачот Питер Сомуа од Гана.
На програмата се нови аранжмани на македонски народни песни и авторски композиции инспирирани од македонската фолклорна традиција. Меѓу нив е и новиот аранжман на „Билјана платно белеше“, на пијанистот Гордан Спасовски.
Концертот „Македонски сновиденија“ ќе биде изведен и во Битола на 16 август во 20 часот пред Офицерскиот дом, без гостувањето на Сомуа. Влезот е слободен.
Концертот е објавен и како ЦД и на дигиталните платформи, а наскоро се најавува и винил-издание. Проектот веќе имаше успешни настапи во Будимпешта, Прага, Виена и во Брисел, каде што Оркестарот беше награден со стоечки овации.
Питер Сомуа е наградуван млад џез-трубач кој живее и работи во Ротердам. Добитник е на „Erasmus Jazz Award“ и на „Edison Jazz Award“, а во својата музика комбинира џез, фанк, соул и традиционална музика од Гана.
