Македонскиот културно-информативен центар во Софија, по повод одбележувањето на дваесетгодишнината од неговото основање, денеска ќе одржи трибина на тема „Стратешки цели и развој на културната дипломатија – улогата на културно-информативните центри“.
Говорници на трибината се директорите на македонските културно-информативни центри во Загреб, Белград, Истанбул и во Софија, г-ѓа Мими Ѓоргоска Илиевска, г. Васко Шутаров, г. Диме Ратајкоски и г. Зоран Пејковски.
Целта на трибината е да иницира конструктивна дискусија за актуелната и за идната улога на македонските културно-информативни центри во странство, со посебен акцент на нивниот придонес во унапредувањето на културната дипломатија, преку размена на искуства, предизвици и визии за развој.
Во рамките на трибината, директорот на македонскиот КИЦ во Софија, г. Зоран Пејковски, на учесниците на трибината ќе им додели признанија и благодарници по повод одбележувањето на дваесетгодишнината од основањето на Центарот.
Со оваа трибина ќе се даде значаен придонес за достоинствено одбележување на овој важен јубилеј и за заедничко обликување на идните насоки на македонската културна дипломатија.
