Во исклучително пријатна и конструктивна атмосфера, министерот за култура и туризам Зоран Љутков денеска се сретна со амбасадорката на Словачка, Ивета Хрицова.
На средбата беше потенцирано дека постојат големи можности за продлабочување на соработката и во културата и во туризмот. Министерот Љутков истакна дека на 50-тото издание на манифестацијата „Струшки вечери на поезијата“ е потпишан Договор за соработка во областа на културата, но со оглед на развојот на соработката во изминатиот период, потребно е да се потпише нов договор, а тоа значи дека во наредниот период ќе се работи на усогласување на некој нов значаен документ.
Министерот информираше дека кон средината на јануари 2026 г. ќе биде објавена и првата официјална програма за развој на туризмот, којашто понатаму ќе отвори нови можности за соработка и во овој дел. Се разговараше и за соработката на мултилатерален план, за членството во меѓународните организации и асоцијации, меѓу кои и фондацијата „Форум на словенските култури“, во чии рамки се реализираат многу активности.
Министерот потсети дека само пред неколку дена е отворен новиот Лекторат по македонски јазик на Универзитетот „Константин Филозоф“ во Нитра, за што амбасадорката упати посебни честитки. Беше потенцирано дека постојат длабоки врски меѓу Нитра и Охрид и во таа смисла, во иднина ќе се разговара за продлабочување и унапредување на врските меѓу двата града, а можеби и за нивно збратимување.
Се разговараше и за соработката во областа на туризмот, а особено позитивно беше оценето тоа што се воспоставени повеќе летови на релација Скопје – Братислава во текот на неделата и дека веќе се размислува и за други летови. Воедно, во однос на конкретни содржини што би можеле да се реализираат во наредниот период, постои интерес од словачката страна изложбата која беше претставена во Кунцхале и во Прага, „Скопје град на солидарноста“, во иднина да биде претставена и во Братислава.
