Државниот секретар во Министерството за култура и туризам, Марија С. Ѓоргова, денеска оствари работна средба со новиот директор на Францускиот институт во Скопје, Грегоар Жислер.
На средбата, одржана во исклучително плодотворна и конструктивна атмосфера, соговорниците досегашната културна соработка ја оценија како исклучително успешна. Беше истакната заедничката определба за развој на уште поголеми и покомплексни заеднички иницијативи со цел засилено претставување на македонската култура во Франција и на француската култура во нашата земја.
Иако меѓу македонското и француското министерство постои Договор за културна соработка, соговорниците отворија дискусија и за воспоставување нова формално-правна рамка која ќе ги конкретизира идните активности и ќе овозможи понатамошно продлабочување на културните врски. Со цел поефикасна реализација на договорените активности, ќе биде формирана и заедничка работна група составена од претставници на Министерството и на Францускиот институт.
Државниот секретар Ѓоргова изрази благодарност за поддршката на трите ТАИЕКС (TAIEX)-мисии, од кои дел се веќе реализирани и со кои се обезбедени обуки за наши стручни лица во областa на заштитата на културното наследство. Беше потврдено дека иницијативата ќе продолжи, со планови за нови мисии и дополнителни програми за јакнење на кадарот во доменот на културното наследство.
Посебен акцент беше ставен и на 2028 година, кога Скопје и францускиот град Бриж ќе бидат европски престолнини на културата. Соговорниците разговараа за можноста во пресрет на оваа значајна година, во 2026/2027 г. да се реализираат заеднички активности и проекти што ќе придонесат за поголема промоција на двата града и на двете култури.
Беше разгледана и иницијативата за организирање голема изложба на македонско културно наследство во Франција и можноста за воспоставување „сезона на македонската култура“ во Париз, со цел зголемување на видливоста на македонската култура и присуство на македонски уметници на француската културна сцена.
На средбата беа поздравени и активностите поврзани со членството на Македонија во Меѓународната организација на франкофонијата. Дополнително, а со оглед на тоа што надлежностите на нашето Министерство се проширени и со секторот туризам, беше отворена и темата за соработка во оваа област.