На 12 јули со гала концерт на Античкиот театар ќе биде отворено 66. издание на фестивалот „Охридско лето“. На свеченото отворање ќе настапат светски познатата сопранистка Ермонела Јахо, тенорот Чарлс Кастроново и Националната опера и балет под диригентство на Марко Боеми.
Во текот на 40-те фестивалски денови ќе се одржат околу 50 настани со учество на повеќе од 700 уметници од 24 земји, со програма што опфаќа класична музика, џез, балет и театар. Годинава за првпат во рамки на фестивалот ќе се реализира и посебна програма со џез-концерти.
Фестивалот ќе одбележи и значајни јубилеи, а ќе бидат организирани тематски културни вечери во соработка со дипломатските претставништва. „Охридско лето“ традиционално се одржува под покровителство на претседателката Гордана Сиљановска-Давкова, со поддршка од Министерството за култура и туризам и бројни партнери.