Претставата „Анна“, по текст на Драгана Лукан Николоски и во режија на Нина Николиќ, создадена како копродукција на Театар Комедија и „Перипетија продукција“, утревечер (26 јуни) ќе биде изведена на 27. Меѓународен фестивал на камерен театар „Златен лав“ во Умаг, Хрватска. Претставата е селектирана во официјалната натпреварувачка програма и ќе конкурира за Гран при.
Станува збор за современа драма која низ интимна и емотивна приказна ги отвора темите на љубовта, припадноста, семејните односи и личната слобода. Претставата говори за цената на изборите што ги правиме и за потребата да останеме верни на себеси, дури и кога тоа значи судир со очекувањата на околината.
Во претставата настапуваат Маја Љутков, Благој Веселинов, Саша Ханџиќ, Маја Зеќо и Тони Денковски (глас), а авторскиот тим го сочинуваат Нина Николиќ (режија), Илина Ангеловска (сценографија), Ивана Каранфиловска Угуровска (костимографија) и Оливер Јосифовски (музика).
Гостувањето на „Анна“ претставува значајна можност за меѓународна промоција на современата македонска театарска продукција и на авторските гласови што го обликуваат домашниот театар денес.