Во галерискиот простор на Македонскиот КИЦ во Софија беше отворена самостојната изложба „Дамки“ на македонскиот уметник Перо Кованцалиев. Изложбата претставува современ уметнички проект во кој преку експериментален визуелен јазик и специфичен процес на согорување текстилен отпад, авторот создава дела со силна филозофска, еколошка и општествена димензија.
На отворањето се обрати директорот на Македонскиот КИЦ во Софија, проф. д-р Зоран Пејковски, кој истакна дека „Дамки“ отвора важни прашања за човекот, општеството и современиот свет, додека македонската амбасадорка Агнеза Руси-Поповска се осврна на значењето на културната соработка и современата македонска уметност.
Со изложбата, Кованцалиев се претставува како автор со зрел и автентичен уметнички израз, кој преку трагите од чадот и согорувањето создава моќни визуелни метафори за минливоста, потрошувачката култура и човечкото постоење.
