Британската издавачка куќа „Лин Рекордс“ го објави новиот албум на македонскиот пијанист Симон Трпчески, со изведби во живо на Вториот и Петтиот концерт за пијано и оркестар од францускиот композитор Камиј Сен-Санс. Албумот е снимен во соработка со диригентот Томас Сондергард и Кралскиот шкотски национален оркестар, на концерти одржани во 2024 година во Глазгов. За насловната страница е искористено делото „Пејзаж“ на македонскиот ликовен уметник Славчо Спировски.
Изданието доби највисоки оценки од повеќе меѓународни музички критичари, меѓу кои и пет ѕвездички од „Би-би-си музички магазин“. Трпчески во наредниот период го продолжува концертниот распоред со настапи во САД и на Тенерифе, а на 2 и 3 ноември ќе настапи и со „Камерниот музички десерт“ во Македонската филхармонија во Скопје.
