Во рамки на Саемот на книгата во Франкфурт, денеска на македонскиот национален штанд ќе се одржи промотивен настан посветен на современата македонска книжевност и можностите за нејзина поголема меѓународна афирмација.
Пред меѓународната професионална публика ќе бидат претставени македонски автори и актуелни книжевни наслови, како и можностите за превод и објавување на македонски дела на странски јазици. Ќе биде презентиран и актуелниот конкурс на Министерството за култура и туризам за финансирање превод и објавување домашни дела.
Саемот започна вчера и ќе трае до 11 октомври, а во текот на саемските денови македонските издавачи ќе остваруваат средби со странски издавачи, литературни агенти и преведувачи, со цел воспоставување нови партнерства и поголема меѓународна присутност на македонската литература.
