Во македонскиот Културно-информативен центар во Загреб се одржа концерт на виолинистот Александар Војнески и пијанистот Арда Мустафаоглу, кои пред бројната публика приредија вечер исполнета со врвна музичка интерпретација и силна емоционална експресија.
Пред почетокот на концертот, присутните ги поздравија директорката на македонскиот Културно-информативен центар во Загреб, Мими Ѓоргоска Илиевска, и амбасадорот на Република Северна Македонија во Република Хрватска, Н.Е. Драган Ѓурчевски. Во своите обраќања, тие ја истакнаа важноста на културната дипломатија и улогата на ваквите настани во промоцијата на македонската култура и уметност во странство.
Концертната програма понуди разновиден репертоар што ги поврза различните музички стилови и естетики во едно заокружено уметничко доживување. Преку одличната соработка меѓу виолината и пијаното, двајцата уметници создадоа впечатлива атмосфера исполнета со музичка длабочина и уметничка зрелост.
Со ваквите настани, македонскиот Културно-информативен центар во Загреб продолжува успешно да ја афирмира македонската култура и уметност и да придонесува за зајакнување на културните врски меѓу Македонија и Хрватска.
