Филмот „17“ во режија на Косара Митиќ, по премиерата на „Берлинале“, продолжува со фестивалскиот живот во април на три интернационални фестивали: на 8 април на 50. Интернационален филмски фестивал во Хонгконг и на 44. Интернационален филмски фестивал во Уругвај, а на 13 април на 39. Филмски фестивал во Болцано, Италија.
Фестивалот во Хонгконг, најстар меѓународен фестивал во Азија, го вклучи „17“ во главната натпреварувачка програма „Младо кино – светски филм“, чија цел е да ги охрабри младите автори.
Уругвајскиот фестивал, најважен во земјата, го селектира „17“ во програмата „Нови режисери“ за филмови со уметнички придонес. Фестивалот во Болцано се фокусира на интернационални филмови за малцинства и го избра „17“ во главната натпреварувачка програма, меѓу 12 филма со моќен уметнички профил.
Во филмот играат: Ева Костиќ, Мартина Даниловска, Даме Јовески, Ева Стојчевска, Петар Маниќ, Жаклина Стефковска Дрнасин, Оливер Митковски, Ана Стојановска, Сашко Коцев, Александра Пешевска и Симеон Дамевски.
„17“ е копродукција на „Црна Мачка продукција“ (Северна Македонија), „Арт&Попкорн“ (Србија) и „Децембер“ (Словенија). Проектот е поддржан од Агенцијата за филм на Северна Македонија, Филмскиот центар на Србија, Словенечкиот филмски центар, „SEE Cinema Network“ и „CineLink Work in Progress“ на 31. Сараевски филмски фестивал.