Во македонскиот Културно-информативен центар во Белград беше отворена изложбата „Простори на конјункција/Картографија на фрагментот: Наративи, граници, меморија“, на која се претставени дела од реномирани македонски автори. Изложбата ја организира КИЦ во соработка со Националната галерија на Македонија. Куратори се: д-р Ана Франговска, Горанчо Ѓорѓиевски, Маја Неделкоска-Брзанова и Маја Чанкуловска-Михајловска од Националната галерија.
Изложбата првично беше претставена во Софија во август, сега е во Белград и ќе биде поставена до крајот на септември. Во почетокот на октомври ќе биде поставена во Истанбул и до крајот на годината во Загреб.
„Концепцијата што ја правеа кураторите за изложбата е ’приказна‘ – простори на спојување. Тука станува збор за комуникација меѓу големите наративи, големите идеи, големите нешта што го движат светот, и – малите лични драми, успеси подеми и падови кои уметниците ги имаат низ своите дела во комбинирани техники на начини на кои најдобро го претставуваат тоа – како нивните мали лични наративи комуницираат со големата приказна“, нагласи во обраќањето директорот на македонскиот КИЦ во Белград, Васко Шутаров.
