На годинашната свеченост на театарските награди „АСКЕЕР“ во Бугарија, претставата „Без крв“, копродукција на Драмскиот театар од Пловдив и Народниот театар „Јордан Хаџи Константинов-Џинот“ од Велес, ја освои наградата за најдобра претстава на професионалниот театар во Бугарија.
Диана Добрева беше наградена за најдобра режија, а Раде Василев и Елена Вангеловска ја добија наградата за најдобра костимографија. Композиторите Сашко Костов и Јавор Карагитлиев беа номинирани во категоријата оригинална театарска музика, а Валентин Светозаров за најдобра сценографија.
Наградите „АСКЕЕР“ се доделуваат од 1991 година. Во претставата, која е работена по текст од Александар Барико, играат актерите од Велешкиот театар: Васил Зафирчев, Кети Борисовска, Исидор Јованоски и Филип Христовски.